P. Vergilius Maro, Aeneid 11.803–817
Camilla, a warrior maiden of Volscian origin, arrives to aid Turnus in his war against Aeneas. She captivates the crowd with her beauty and martial prowess, representing a figure of exceptional courage and supernatural speed.
Tier 1
post omnēs aliōs ducēs, ultima advēnit Camilla, dē gente Volscā. agmen equitum dūcēbat et multās cōpiās armātās.
aliae fēminae lānam faciēbant et domī manēbant. Camilla nōn ita erat. Camilla bellatrīx erat; proelia dūra patiēbātur et cursū ventōs superābat.
tam vēlōx erat ut per summās herbās currere posset, nec tenerās spīcās laederet. tam vēlōx erat ut per medium mare currere posset, nec pedēs suōs madidōs faceret.
omnis iuventūs ex tēctīs agrīsque effūsa est. eam vidēre volēbant. mātrēs quoque cucurrērunt. omnēs Camillam spectābant. ōra eōrum aperta erant; attonitī erant.
quid vidēbant? purpuram rēgiam in umerīs levibus gerēbat. fibula aurea comam tenēbat. pharetram Lyciam portābat. et hastam portābat, hastam ex myrtō factam, cuspide ācrī.
Tier 2
Camilla dē gente Volscā hīs super advēnit; agmen equitum dūcēbat et catervās armātās. bellatrīx, nōn illa manibus ad opus fēmineum solita, sed virgō proelia dūra patī cursūque pedum ventōs superāre [solita].
illa vel per summās herbās intāctae segetis currere posset nec tenerās spīcās cursū laedere, vel per medium mare super undās suspēnsa iter facere nec pedēs madidōs facere.
illam omnis iuventūs tēctīs agrīsque effūsa turbaque mātrum mīrātur et euntem prōspectat, ut purpura rēgia levīs umerōs velāret, ut aurea fibula comam tenēret, ut ipsa Lyciam pharetram gereret et hastam myrtō ōrnātam cum cuspide ācrī.
Tier 3
Camilla dē gente Volscā hīs super advēnit, agmen equitum agēns et catervās flōrentīs aere; bellatrīx, nōn illa fēmineās manūs colō calathīsve Minervae adsuēta, sed [illa] virgō proelia dūra patī cursūque pedum ventōs praevertere [adsuēta].
illa vel per summa grāmina intāctae segetis volāret nec tenerās aristās cursū laedisset, vel [iter] per medium mare fluctū tumentī suspēnsa ferret celerīs nec plantās aequore tingeret.
illam omnis iuventūs tēctīs agrīsque effūsa turbaque mātrum mīrātur et euntem prōspectat, [mīrātī] attonitīs animīs inhiāns ut rēgius honōs levīs umerōs ostrō velet, ut fibula crīnem aurō internectat, ut [Camilla] ipsa Lyciam pharetram gerat et pastōrālem myrtum praefīxā cuspide.
Tier 4 - Carmen Ipsum
- hōs super advēnit Volscā dē gente Camilla
- agmen agēns equitum et flōrentīs aere catervās,
- bellatrīx, nōn illa colō calathīsve Minervae
- fēmineās adsuēta manūs, sed proelia virgō
- dūra patī cursūque pedum praevertere ventōs.
- illa vel intāctae segetis per summa volāret
- grāmina nec tenerās cursū laedisset aristās,
- vel mare per medium fluctū suspēnsa tumentī
- ferret iter celerīs nec tingeret aequore plantās.
- illam omnis tēctīs agrīsque effūsa iuventūs
- turbaque mīrātur mātrum et prōspectat euntem,
- attonitīs inhiāns animīs ut rēgius ostrō
- velet honōs levīs umerōs, ut fibula crīnem
- aurō internectat, Lyciam ut gerat ipsa pharetram
- et pastōrālem praefīxā cuspide myrtum.