C. Iulius Caesar, De Bello Gallico 4.34
Caesar has come up from the camp with the guard cohorts, and the Seventh is still surrounded in the grainfields. The passage covers the remainder of that day, the run of bad weather that follows, and the muster the Britons raise in the meantime.
Tier 1
nostrī mīlitēs novum genus pugnae vīdērunt et timuērunt. tum Caesar auxilium tulit. hostēs Caesarem vīdērunt et cōnstitērunt. itaque nostrī mīlitēs iam nōn timēbant.
Caesar sīc putāvit: hoc tempus nōn est bonum. hostēs hodiē nōn oppugnābimus. itaque mīlitēs in eōdem locō manēbant. paulō post Caesar legiōnēs in castra redūxit.
nostrī mīlitēs omnēs occupātī erant. itaque reliquī Britannī, quī in agrīs erant, discessērunt.
tum multōs diēs magnae tempestātēs erant. Rōmānī in castrīs manēbant. Britannī quoque pugnāre nōn poterant.
interim barbarī nūntiōs in omnēs partēs mīsērunt. nūntiī suīs dīxērunt: paucī sunt mīlitēs Rōmānī. Rōmānōs ē castrīs expellere possumus. tum magnam praedam capiēmus et semper līberī erimus.
itaque Britannī magnam multitūdinem mīlitum et equitum celeriter coēgērunt. tum ad castra Rōmāna vēnērunt.
Tier 2
nostrī mīlitēs novum genus pugnae timēbant et perturbātī erant. eō ipsō tempore Caesar auxilium tulit. ubi Caesar cum auxiliō advēnit, hostēs cōnstitērunt et nostrī mīlitēs sē ex timōre recēpērunt.
tum Caesar sīc putāvit: nōn est bonum tempus hostem oppugnāre aut proelium committere. itaque sē suō locō continuit et paulō post legiōnēs in castra redūxit.
dum haec geruntur, nostrī omnēs occupātī erant; itaque reliquī Britannī quī in agrīs erant discessērunt.
tum multōs diēs continuōs magnae tempestātēs erant. hae tempestātēs nostrōs mīlitēs in castrīs continēbant et hostēs ā pugnā prohibēbant.
interim barbarī nūntiōs in omnēs partēs mīsērunt. nūntiī suīs dīxērunt: paucī sunt mīlitēs Rōmānī. sī Rōmānōs ē castrīs expulerimus, magnam praedam capere et in perpetuum līberī esse poterimus. itaque magnam multitūdinem mīlitum et equitum celeriter coēgērunt et ad castra nostra vēnērunt.
Tier 3
quibus rēbus perturbātīs nostrīs [mīlitibus] nōvitāte pugnae, Caesar tempore opportūnissimō auxilium tulit: namque adventū ēius hostēs cōnstitērunt, nostrī [mīlitēs] sē ex timōre recēpērunt.
quō factō, arbitrātus tempus aliēnum esse ad lacessendum hostem et committendum proelium, continuit sē suō locō et, brevī tempore intermissō, in castra legiōnēs redūxit.
dum haec geruntur, nostrīs omnibus [mīlitibus] occupātīs, reliquī, quī in agrīs erant, discessērunt.
secūtae sunt continuōs complūrēs diēs tempestātēs, quae et continērent nostrōs [mīlitēs] in castrīs et prohibērent hostem ā pugnā.
interim barbarī nūntiōs in omnēs partēs dīmīsērunt paucitātemque nostrōrum mīlitum suīs praedicāvērunt et dēmōnstrāvērunt quanta facultās praedae faciendae atque suī in perpetuum līberandī darētur, sī Rōmānōs castrīs expulissent.
hīs rēbus, magnā multitūdine peditātūs equitātūsque celeriter coāctā, ad castra vēnērunt.
Tier 4 - Liber Ipse
quibus rēbus perturbātīs nostrīs nōvitāte pugnae tempore opportūnissimō Caesar auxilium tulit: namque ēius adventū hostēs cōnstitērunt, nostrī sē ex timōre recēpērunt. quō factō, ad lacessendum hostem et committendum proelium aliēnum esse tempus arbitrātus suō sē locō continuit et, brevī tempore intermissō, in castra legiōnēs redūxit. dum haec geruntur, nostrīs omnibus occupātīs, quī in agrīs erant reliquī discessērunt. secūtae sunt continuōs complūrēs diēs tempestātēs, quae et nostrōs in castrīs continērent et hostem ā pugnā prohibērent. interim barbarī nūntiōs in omnēs partēs dīmīsērunt paucitātemque nostrōrum mīlitum suīs praedicāvērunt et quanta praedae faciendae atque in perpetuum suī līberandī facultās darētur, sī Rōmānōs castrīs expulissent, dēmōnstrāvērunt. hīs rēbus celeriter magnā multitūdine peditātūs equitātūsque coāctā ad castra vēnērunt.
