C. Iulius Caesar, De Bello Gallico 4.28
The peace is settled and the camp is quiet, but the eighteen transports carrying the cavalry are still in Gaul. The passage covers their crossing and the weather off the British coast.
Tier 1
Rōmānī quattuor diēs in Britanniā manēbant. tum pāx facta est. in Galliā erant XVIII nāvēs. hae nāvēs equitēs Rōmānōs portābant. ventus nōn magnus erat. itaque nāvēs ex portū nāvigāvērunt.
mox nāvēs prope Britanniam erant. mīlitēs nostrī eās ex castrīs vidēbant. subitō tamen magna tempestās coörta est. nūlla nāvis cursum tenēre poterat. ventus aliās nāvēs ad Galliam rettulit. aliās nāvēs ad aliam partem īnsulae ēgit, ubi sōl cadit. magnum erat perīculum.
hae nāvēs ancorās iēcērunt. sed fluctūs nāvēs aquā complēvērunt. itaque nāvēs nocte iterum in altum nāvigāvērunt. nox erat inimīca, sed nāvēs ad Galliam vēnērunt.
Tier 2
quattuor diēbus postquam Rōmānī in Britanniam vēnērunt, hīs rēbus pāx facta est. tum nāvēs XVIII, quae equitēs portāverant, ex superiōre portū solvērunt, quod ventus nōn magnus erat.
eae nāvēs Britanniae appropinquābant, et mīlitēs eās ex castrīs vidēbant. subitō tamen tanta tempestās coörta est ut nūlla nāvis cursum tenēre posset. ventus aliās nāvēs rettulit eōdem unde profectae erant. aliās nāvēs ad īnferiōrem partem īnsulae dēiēcit, quae est propius sōlis occāsum. magnum erat perīculum.
hae nāvēs ancorās iēcērunt, sed fluctūs eās aquā complēvērunt. necesse igitur erat in altum nāvigāre. nox erat inimīca, sed nāvēs ad Galliam vēnērunt.
Tier 3
hīs rēbus pāce cōnfirmātā, post diem quārtum quam ventum est in Britanniam, nāvēs XVIII, dē quibus suprā dēmōnstrātum est, quae equitēs sustulerant, solvērunt ex superiōre portū lēnī ventō.
eae cum appropinquārent Britanniae et vidērentur ex castrīs, tanta tempestās subitō coörta est ut nūlla eārum posset tenēre cursum, sed aliae referrentur eōdem unde profectae erant, aliae dēicerentur ad īnferiōrem partem īnsulae, quae est propius sōlis occāsum, magnō suī cum perīculō; quae [nāvēs] tamen, ancorīs iactīs, cum fluctibus complērentur, necessāriō adversā nocte in altum prōvēctae, petiērunt continentem.
Tier 4 - Liber Ipse
hīs rēbus pāce cōnfirmātā, post diem quārtum quam est in Britanniam ventum nāvēs XVIII, dē quibus suprā dēmōnstrātum est, quae equitēs sustulerant, ex superiōre portū lēnī ventō solvērunt. quae cum appropinquārent Britanniae et ex castrīs vidērentur, tanta tempestās subitō coörta est ut nūlla eārum cursum tenēre posset, sed aliae eōdem unde erant profectae referrentur, aliae ad īnferiōrem partem īnsulae, quae est propius sōlis occāsum, magnō suī cum perīculō dēicerentur; quae tamen, ancorīs iactīs, cum fluctibus complērentur, necessāriō adversā nocte in altum prōvēctae, continentem petiērunt.
