palaestra erat pars thermārum Rōmānārum. in palaestrā Rōmānī sē exercēbant. Rōmānī, ubi palaestram intrābant, servō pecūniam dabant. tunc cum amīcīs conveniēbant. aliī per palaestram currēbant. aliī discōs et pilās iaciēbant. aliī virī inter sē pugnābant; hōs virōs Rōmānī pugilēs vocābant. variī mercātōrēs in palaestrā cibum et vīnum vēndēbant.

post palaestram Rōmānī ad apodytērium prōcēdēbant. apodytērium erat locus ubi Rōmānī vestēs relinquēbant. cīvēs vestēs servīs saepe trādēbant, quod fūrēs saepe in thermīs aderant. fūrēs erant hominēs malī quī rēs aliōrum capiēbant. hī fūrēs saepe vestēs pulchrās in apodytēriō capiēbant. deinde Rōmānī ad tepidārium prōcēdēbant, ubi sedēbant et inter sē colloquium habēbant.

in tepidāriō vapor erat, et corpora Rōmānōrum calida fīēbant. tunc Rōmānī calidārium intrābant. in calidāriō aqua erat calidissima. sub thermīs erat hypocaustum. hypocaustum erat locus ubi flammae ārdēbant et aquam calidam faciēbant. ibi servī oleum in corpora dominōrum impōnēbant, deinde oleum strigilibus dētrahēbant. strigilis erat parva rēs quā servī corpora pūrgābant. aqua frīgida quoque cīvibus aderat.

post calidārium Rōmānī ad frīgidārium prōcēdere poterant. frīgidārium erat locus ubi aqua frīgida erat. ibi Rōmānī in aquā natābant.

Rōmānī in thermīs nōn sōlum corpora pūrgābant, sed etiam cum amīcīs conveniēbant.